BUTUAN CITY – Niabot na sa 37 ang ihap sa nangamatay sa kusog nga linog nga mitay-og sa Mindanao, sumala sa Office of Civil Defense (OCD).
Kadaghanan sa mga biktima gikan sa Soccsksargen ug Davao Region, samtang gatusan ka laing tawo ang samdan ug liboan ka pamilya ang naapektuhan.
Sumala sa taho sa OCD, hangtod sa alas-6:00 sa buntag sa Hunyo 9, 2026, 33 ka tawo ang namatay sa Soccsksargen (18 sa Sarangani, 12 sa General Santos City, ug 3 sa South Cotabato), ug 4 usab sa Davao Region.
Kadaghanan sa mga biktima naigo sa nangatagak nga tipaka. Gawas niini, 456 ang angol ug upat ang missing.
Gibanabanang 17,689 ka pamilya o 77,186 ka indibidwal ang naapektuhan sa magnitude 7.8 nga linog nga miigo sa Sarangani niadtong Hunyo 8. Nagpabilin nga nakatutok ang mga search, rescue, ug retrieval operations sa General Santos City ug Sarangani, nga lakip sa pinakagrabeng naigo.
Gideklara na ang state of calamity sa General Santos City, samtang nagpadayon ang pag-deploy sa mga responder sa uban pang dapit. Base sa unang assessment, 9 ka tulay ug 19 ka dalan ang nangaguba, ug gibanabana nga kapin sa 900 milyones pesos ang kantidad sa kadaot sa imprastruktura.
Niabot ngadto sa 1,889 ka balay ang nangadaot, diin hapit 1,500 niini ang hingpit nga nahugno.
Dunay kadaot usab sa General Santos International Airport, hinungdan sa pagkansela sa mga komersyal nga flight.
Gitugotan lamang sa Civil Aviation Authority of the Philippines ang paggamit sa tugpahanan alang sa military, government, ug humanitarian flights.
Daghan sa mga residente ang nagpabilin sa mga hawan nga dapit tungod sa mga aftershocks ug kabalaka sa kalig-on sa ilang mga panimalay.
Gitun-an sa kagamhanan ang pagtukod og mga temporary shelter ug tent cities alang sa mga nawad-an og kapuy-an.
Napadala na usab ang mga generator ug suplay sa gasolina sa mga ospital ug mga kritikal nga pasilidad nga naapektuhan sa brownout.
Samtang, gisuspinde ang mga klase sa pipila ka dapit karong Hunyo 9 isip pagpangandam ug paghatag bili sa kaluwasan.
