BUTUAN CITY – Gi-aghat sa administrasyong Marcos ang publiko nga padayon nga suportahan ang kampanyang “4 O’Clock Habit” sa Department of Health (DOH) batuk sa dengue ug uban pang sakit nga dala sa lamok ilabina karung nagsugod na ang ting-ulan.
Sigon ni Presidential Communications Office Undersecretary ug Palace Press Officer Claire Castro nga giila pa gihapon sa World Health Organization (WHO) ang vector control isip nag-unang pamaagi aron malikayan og makontrol ang dengue.
Ang “4 O’Clock Habit” o “Alas Kwatro Kontra Mosquito” nag-aghat sa publiko nga himoon ang ekulob, e-taktak, paughon ug takliban aron mawala ang mga posibleng puy-anan sa lamok ug malikayan ang pagkuyanap sa dengue.
Sigon ni Castro, ang padayon nga pagpatuman sa mga lakang batuk sa dengue nakatabang sa dakong pagkunhod sa ihap sa mga kaso sa nasud karung tuiga.
Base sa pinaka-ulahing datos sa DOH, mikunhod sa 57 porsiyento ang mga kaso sa dengue sa tibook nasud gikan sa 110,924 kaso sa kaparehong panahon niadtong nakalabay nga tuig hangtud 48,151 kaso ning tuiga.
Sa dihang gipangutana mahitungod sa posibleng pag-apruba sa bakuna batuk sa dengue, gibutyag ni Castro nga nagpabiling ma-ampingon ang gobyerno samtang gihimo pa sa Food and Drug Administration (FDA) ang pagsusi sa Qdenga dengue vaccine nga gimugna sa Japanese pharmaceutical firm nga Takeda Pharmaceutical Company.
