BUTUAN CITY – Nagpasidaan ang Iran nga mamahimong maapektuhan ang nagtunhay nga ceasefire understanding niini sa Estados Unidos kung magpadayon ang mga pag-atake sa Israel sa Beirut, Lebanon, taliwa sa misamot nga tensyon sa rehiyon.
Sumala ni Iranian Foreign Minister Abbas Araghchi, ang kasabutan sa Washington nagtumbok sa “ceasefire nga lakip sa Lebanon,” ug bisan unsang pagsupak sa usa ka lugar mamahimong magresulta sa pagkawala sa katibuk-ang kasabutan.
Ang pamahayag maoy misunod sa mando ni Israeli Prime Minister Benjamin Netanyahu nga mohimo og airstrikes sa Dahieh district sa Beirut, nga gitawag niyang “terror infrastructure” nga dunay kalambigitan sa mga pag-atake sa rocket ug drone nga gikutay sa Hezbollah.
Sigon ni U.S. President Donald Trump nga padayon siyang nakig-estorya sa duha ka panig, lakip na kang Netanyahu ug mga representante nga dunay kalambigitan sa Hezbollah.
Sa iyang social media posts, gibutyag ni Trump nga walay tropang ipadala sa Beirut tungod sa nagtunhay nga kasabutan nga ihunong ang kagubot bugti sa paghunong sa Israel sa pagpamomba sa Lebanon.
Bisan paman niini, walay kumpirmasyon sa gika-ingong direktang komunikasyon sa U.S. ug Hezbollah.
Gikumpirma usab ni Netanyahu ang pakig-estorya kang Trump apan gipamugos niini nga magpadayon ang Israel sa operasyon batuk sa Hezbollah kung magpadayon ang militanteng grupo sa pag-atake sa mga sibilyan sa Israel.
