BUTUAN CITY -Nagpagawas ug warrant of arrest ang Sandiganbayan Fifth Division batok kang Senador Jinggoy Estrada tungod sa kaso nga plunder nga may kalabotan sa gika-ingong P573 milyon nga kickbacks gikan sa mga flood control projects niadtong 2025.
Ang warrant gipagawas pipila ka adlaw human siya nakapyansa sa laing kaso nga graft, diin nagbayad siya ug P90,000 alang sa temporaryo nga kagawasan.
Apil sa mga gikasuhan uban ni Estrada mao si kanhi DPWH Secretary Manuel Bonoan ug pipila ka opisyal sa DPWH-NCR nga nalambigit matud pa sa iligal nga budget insertions ug payout scheme.
Kini na ang ikatulong higayon nga nag-atubang si Estrada sa kaso nga plunder human niadtong 2001 kondii gi-aresto siya tungod sa jueteng scandal human sa pagpahawa sa iyang amahan nga si kanhi Presidente Joseph Estrada, apan naabsuwelto niadtong 2007 ug sunod niadtong 2014, nag-atubang usab siya og PDAF scam ug nakapiyansa niadtong 2017.
Bisan pa sa bag-ong warrant, gipamugos ni Estrada nga wala’y basehan ang mga pasangil ug naglaum siya sa patas nga pagdungog ug hustisya dayong butyag nga gamiton nila ang tanang legal nga paagi aron kuwestiyunon ang kaso ug ipakita ang ebidensya nga makapamatood sa iyang pagka-inosente.
