BUTUAN CITY – Gikonsidera ni Denmark Suede, Bombo International Correspondent to Australia nga usa ka dakong kontrobersiya ang pagkalakip sa babayeng Australian nga si Kate Gibson sa depensa ni Kanhe Pangulong Rodrigo Duterte sa giatubang nga kaso sa International Criminal Court kon ICC.
Una nang gikumpirma sa International Criminal Court Registry ang pagtudlo sa Australian lawyer isip associate counsel ni Duterte sa giatubang niyang kaso nga crimes against humanity.
Sigon ni Suede sa pakighinabi sa Bombo Radyo nga isip usa ka babaye, gilantaw untana sa maong abogado ang mga batan-ong biktima sa kampanya sa giyera kontra drogas sa kanhe pangulo.
Gipa-ambit pa niini nga dili sikat ang pangalan sa maong abogado sa Australia bisan og 21 ka tuig na kini nga nag-practice isip International Lawyer hinoon mas ilado siya sa gawas sa maong nasud diin nakabase kini sa Bangkok, Thailand.
Apan aminado si Suede nga utukan ang maong abogado ilabina kay nahimo kining school captain sa pagtungha niini sa Australia, nga boot pasabot siya ang pinaka-utukan sa ilang klase.
Si Gibson usa ka beteranong defense lawyer nga nahimong parte sa legal team nga nagpadaug og acquittal para kang kanhe Congolese Vice President Jean-Pierre Bemba niadtong 2018. Nagtrabaho usab siya sa kaso ni kanhe Liberian President Charles Taylor.
