BUTUAN CITY – Gilimod sa Malacañang Palace ang alegasyon ni Senator Imee Marcos nga dunay nagtunhay nga pagpamugos ug paghulga batuk sa mga magbabalaod aron suportahan ang impeachment complaint batuk kang Vice President Sara Duterte.
Sigon ni Palace Press Officer Claire Castro, walay basehan ang mga akusasyon kung dili kini apilan og klaro nga ebidensya.
Gipahayag usab sa opisyal sa Palasyo nga daw naanad na matud pa ang pipila ka personalidad sa pagpalutaw og mga boot-boot og intriga imbes nga maglatag og konkretong ebidensya.
Gitumbok usab niya si kanhe Pangulong Rodrigo Duterte mahitungod sa nasangpit nga pamahayag.
Una nang gibutyag ni Marcos sa usa ka video statement nga dunay pipila ka miyembro sa House of Representatives ug Senado ang nag-atubang og pagpanghadlok ug bahad nga kaso kung dili mosuporta sa impeachment complaint batuk kang Duterte.
Sumala sa senadora, dunay mga magbabalaod nga gihulgang kasuhan sa Office of the Ombudsman, samtang gigamit usab ang ubang ahensya sama sa Department of Justice (DOJ), National Bureau of Investigation (NBI), ug Securities and Exchange Commission (SEC) aron ipiton ang mga dili pabor sa impeachment.
Nalitok usab ni Marcos nga dunay pipila ka pondo sa mga magbabalaod ang nalangay human gimarkahan isip “for later release” o FLR, butang nga nakaapekto sa mga proyekto para sa ilang mga distrito.
Apan wala na naghatag og pangalan ang senadora sa mga opisyal nga matud pa nakasinati og pressure gikan sa administrasyon.
Nakatakdang dalhon sa plenaryo sa Kamara de Representantes ang impeachment report para botohan diin kinahanglan og 106 ka boto adiser kini mapalabang sa Senado nga magsilbing impeachment court.
