BUTUAN CITY – Gipakita sa Colombian pop idol nga si Shakira ang teaser sa bag-ong opisyal nga kanta para sa 2026 FIFA World Cup pinaagi sa pagpagawas og hamubo nga video sa kanta nga gi-shoot sa bantugang Maracanã Stadium sa Rio de Janeiro.
Ang singer — nga naghimo usab sa anthem sa 2010 World Cup nga Waka Waka o sa English pa This Time for Africa — mipahibalo sa kanta nga gitawag og Dai Dai pinaagi sa iyang social media account.
Makita sa 67-segundos nga video si Shakira sa field sa Maracanã diin siya nagpasundayag sa libre nga concert sa Copacabana Beach sa miaging Sabado atubangan sa kapin 2-milyones ka tawo.
Samtang nagkupot sa “Trionda,” ang opisyal nga bola para sa 2026 World Cup, gikanta ni Shakira ang pipila ka bahin sa kanta sa English uban sa mga dancers nga nagsul-ob sa kolor sa nagkadaiyang teams, lakip na ang United States ug Colombia.
Ang kanta gihimo uban sa Nigerian artist nga si Burna Boy ug opisyal nga ipagawas karong Mayo 14. Ang clip, nga gi-share usab sa FIFA World Cup account, nagtapos sa mensaheng: “We’re ready!”
Nasayrang dugay na ang koneksyon ni Shakira sa World Cup tungod kay nag-perform na siya sa finals sa 2006 ug 2014 World Cup gawas pa sa paghimo sa “Waka Waka” para sa torneyo sa 2010.
