BUTUAN CITY – Gitay-og sa magnitude 6.1 nga linog ang Eastern Samar kaganinang alas-dos sa hapon. Base sa datos sa Philippine Institute of Volcanology and Seismology (PHIVOLCS), natigayon ang pagtay-og sa gilay-ong 9-kilometros sa amihanang kasadpan sa San Julian, Eastern Samar, nga duna’y gilawmong 10 kilometro.
Natala ang Intensity V sa Can-Avid, Eastern Samar; Dulag ug sa Alangalang sa Leyte; apil na sa Gandara sa Samar. Intensity IV usab ang natala sa Abuyog, Palo, ug Carigara sa Leyte.
Samtang sa Naval sa Biliran, Hernani sa Eastern Samar, Ormoc City, Hilongos, Albuera, Baybay, Villaba, ug Isabel sa Leyte, apil na sa Sorsogon City ug Bulusan sa Sorsogon, ug pipila ka lungsod sa Southern Leyte, nabati ang Intensity III.
Ang Tacloban ug buong Eastern Visayas, taud-taud nga nabati ang linog tungod kay ang ilang lokasyon nanaa man sa Pacific Ring of Fire ug sa Philippine Fault Zone.
Madumdumang mi-igo sa maong rehiyon ang magnitude 7.6 nga linog sa Samar niadtong Agosto 31, 2012, nga miresulta sa pagkaguba sa daghang dakbalay ug mga imprastruktura.
