BUTUAN CITY – Nawala ang duha ka miyembro sa militar sa US atol sa usa ka military exercise sa Morocco, sumala sa US African Command kon Africom.
Ang mga na-missing nga Amerikano nag-apil sa African Lion 2026, usa ka tinuig nga joint exercise nga gituyo aron mapalig-on ang operasyon tali sa pwersa sa US, mga kaalyado sa Nato, ug mga nasod sa Africa.
Sumala sa Africom nga na-report silang nawagtang niadtong Sabado duol sa Cap Draa Training Area, nga naa duol sa siyudad sa Tan Tan sa Morocco.
Nagpadayon karon ang search and rescue mission nga naglakip og mga pwersa sa yuta, kahanginan, ug dagat gikan sa US, Morocco, ug ubang mga nasod.
Nagtuo ang mga awtoridad nga usa kini ka aksidente ug walay kalabotan ang terorismo o kidnapping, sumala sa usa ka opisyal sa US nga adunay kahibalo sa maong panghitabo.
Ang African Lion, nga pinakadako nga tinuig nga joint military exercise sa kontinente, gina-host sa Morocco, Ghana, Senegal, ug Tunisia.
Nagpokus kini sa all-domain operations, crisis response, ug multinational coordination aron mapalambo ang regional security ug pagpangandam sa mga emerhensiya.
Ang exercise, nga ginaapilan sa 5-mil ka personnel gikan sa kapin sa 40 ka nasod ug sobra sa 30 ka US-based industry partners, gihimo gikan sa Abril 27 hangtod sa Mayo 8.
