BUTUAN CITY – Nadiskubrehan sa mga siyentista nga ang kulang o dili maayong tulog mahimong makapugong sa abilidad sa utok paglimpyo sa mga hugaw ug toxins, nga mahimong makadugang sa risgo sa dementia.
Ang pagtuon nagsusi sa MRI scans sa 40,000 ka mga hamtong gikan sa UK Biobank, nga nag-focus sa glymphatic system.
Dinhi nasuta nga sa usa ka himsog nga utok, ang cerebrospinal fluid (CSF) mudagayday pinaagi sa glymphatic system aron kolektahon ug tangtangon ang mga hugaw ug toxins gikan sa utok.
Sigon sa mga tigdukiduki sa University of Cambridge, migawas nga ang kakulang sa tulog mahimong maka-apekto sa maayong pagtrabaho sa glymphatic system.
Importante ang maayong tulog tungod kay samtang natulog ang tawo, ang utok naglimpyo sa mga toxins rason nga kung pirmi maguba ang tulog, mahimo kining makadugang sa risgo sa dementia sa ulahing bahin sa kinabuhi.
Ang dementia usa ka termino alang sa problema sa paghinumdom, paghunahuna, ug paghimo og desisyon nga naka-apekto sa adlaw-adlaw nga buluhaton.
Sumala sa Centers for Disease Control and Prevention, ang dementia dili normal nga bahin sa pagkatigulang samtang ang Alzheimer’s disease mao ang pinakakomon nga klase sa dementia.
