BUTUAN CITY -Mag-agbat na ang mga kanhi heavyweight champions nga sila Anthony Joshua ug Tyson Fury alang sa dugay nang gihulat nga all-British grudge match.
Si Joshua kinsa wala pa makig-away sukad sa usa ka aksidente sa sakyanan nga mikalas sa iyang duha ka suod nga higala sa katapusang bahin sa miaging tuig, makig-agbat una kang Albanian boxer Kristian Prenga sa Saudi Arabia karong Hulyo.
Sigon sa promoter sa 36-anyos nga boxer nga si Eddie Hearn, nahuman na ang kasabutan alang sa away batok kang Fury — usa usab ka duha ka higayon nga world champion — human sa pila ka tuig sa espekulasyon ug napakyas nga negosasyon.
Hinuon wala pa gipahibalo ang insaktong petsa o venue apan gilauman nga mahitabo ang away sa Nobyembre ug ipasalida sa Netflix.
Madumdunang si Joshua naka-angkon og gamay nga injury human sa away niadtong Disyembre diin iyang gipilde pinaagi sa sixth-round knockout si YouTube star Jake Paul.
Si Joshua adunay rekord nga 29 ka daug, lakip ang 26 ka knockout, ug upat ka pildin sa iyang 33 ka away samtang si Fury adunay rekord nga 35 ka daugan, lakip ang 24 ka knockout, usa ka draw ug duha ka pildi sa iyang 38 ka mga away.
