BUTUAN CITY – Naglaum si Senador Risa Hontiveros nga isulti ni kanhi Ako Bicol Representative Zaldy Co ang iyang mga nahibal-an kabahin sa dako kaayong flood control projects scam sa gobyerno sa iyang pagbalik sa Pilipinas.
Sa eksklusibong interview sa Bombo Radyo Philippines kang Hontiveros, iyang gibutyag nga usa ka dakong bahin ang kooperasyon sa kanhi kongresista, nga gika-ingong adunay dakong partisipasyon sa nabulgar nga korapsyon, sa gi-build up base sa serye sa mga ebidensya sa Senate Blue Ribbon Committee.
Dakong tabang usab kini sa pinal nga report sa gihimo nga pagdungog ug imbestigasyon sa komite.
Alayon niini, kumpiyansa si Hontiveros nga madugangan pa ang mga pirma sa partial committee report sa Blue Ribbon Committee nga gipangulohan ni Senate President Pro Tempore Panfilo “Ping” Lacson.
Naglaum usab kini nga ang pagkadakop kang Co makatabang sa pagdasig sa uban pa nilang mga senador nga mopirma sa pasi-unang report sa komite aron mapresentar na kini sa plenaryo ni Lacson ug mapa-ambit na sa publiko.
Sa pagkakaron, adunay na kini 6 ka pirma ang maong partial report ug nagkinahanglan pa og 3 ka pirma aron hingpit nga madala sa plenaryo sa Senado diin kini hisgutan sa mga senador, usbon ug paglig-unon aron makatabang sa mas lawom nga imbestigasyon sa Senado ug sa mga ahensya sa gobyerno.
