BUTUAN CITY – Gi-anunsiyo sa Butuan City Water District kon BCWD nga gisugdan na kagahapong adlawa ang implementasyon sa Oplan Sag-ob isip temporaryong alternatibong kakuhaan og tubig karung miubos ang kapasidad sa sistema niini sa pag-supply og tubig.
Base sa pagpahibalo sa buhatan kagahapong adlawa, mamahimong magsag-ob ang katawhan sa Butuan diha sa Pump Station No. 1 nga nahimutang sa national highway, Alviola Village, Brgy. Baan Km. 3, Butuan City.
Base sa gipagawas nga schedule, ang mga residential consumers magsag-ob sugod sa alas 6:00 sa buntag ngadto sa alas 6:00 sa gabii apan dunay gilatag nga mga kondisyun sama sa kinahanglang 1 cubic meter per account o kausa lang magsag-ob kada adlaw aron matud pa mahatagan og tsan-sa ang uban.
Lakip sa rekisitos nga magdala og Updated Statement of Account og Updated nga resibo o Water Bill.
Samtang alang sa Inactive Concessionaires, aron maka-avail sa Oplan Sag-Ob, kinahanglan silang moadto sa BCWD Commercial Office sa Gov. J.A. Rosales Avenue, alang sa reactivation sa accounts adiser maka-avail og tubig diha sa Pump Station No. 1. Apan base sa ilang anunsiyo, hangtud kagahapon lamang sa alas 5:00 sa hapon pwede magpa-reactivate sa accounts.
Samtang ang para sa Bulk Sale, walay minimum charge apan ang rate base sa published Commodity Charge alang sa Bulk Sale diin ang prayoridad mao ang Barangays pinaagi sa Barangay Captain og subdivisions pinaagi sa Homeowners Association President.
Ang pagbayad himoon sa BCWD Office og epresenta lang ang opisyal nga resibo sa Pump Station No. 17, tapad sa BCWD Filtration Pump, Brgy. Taguibo, Butuan City.
Isip precautionary measure, ang mga lugar nga dunay nag-agas nga tubig sa ilang gripo, gitambagang magpondo og tubig.
Gipahimangnoan usab niini ang mga concessionaires nga pabukalan ang tubig gikan sa water tanks o sudlanan adiser gamiton sa pag-inom o pagluto.
Gihimo ang Oplan Sag-ob human nasuta kagahapong adlawa nga ang daily water supply sa Taguibo Aquatech Solutions Corporation kon TASC nga maoy bulk water supplier sa Butuan City Water District anaa sa 37.71 million liters per day (MLD) tungod sa kakulang sa pag-ulan sa Sitio Iyao, Barangay Anticala, Butuan City.
Sa karun hugot ang koordinasyon sa BCWD ngadto sa TASC alang sa updates sa water supply dayung awhag sa concessionaires nga mag-conserve og tubig.
