BUTUAN CITY- Gi-anunsyo sa Philippine Statistics Authority (PSA) nga ming-abot sa 4.5 porsyento ang inflation rate sa Agusan del Sur alang sa bulan sa Marso 2026.
Sumala sa presentasyon ni Lovervelle Olaco sa PSA, bisan kon ang Agusan del Sur ang nakatala sa pinakaubos nga inflation rate sa tibuok Caraga Region, nabantayan gihapon ang padayon nga pagsaka sa presyo sa mga batakang palaliton ug serbisyo sa probinsya.
Kini nahitabo dungan sa pagsaka sa regional inflation ngadto sa 5.5 porsyento, gikan sa 3.6 porsyento niadtong bulan sa Pebrero. Sa nasudnong lebel, ming-abot usab sa 4.1 porsyento ang inflation sa Pilipinas. Gipunting niini nga ang mga nag-unang rason sa maong pagsaka mao ang mas mahal nga presyo sa Pagkaon ug non-alcoholic beverages; Transportasyon; Gasto sa balay, tubig, kuryente, ug uban pang fuel.
Taliwa sa pag-ubos sa inflation sa Agusan del Sur, mipasidaan ang mga ekonomista nga ang padayon nga pagsaka niini nagpasabot og dugang kabug-at sa gastohan sa mga panimalay. Tungod niini, padayon karon ang lokal nga panggamhanan sa pagbantay sa presyo sa merkado aron masiguro ang lig-on nga suplay ug magpabilin nga abot-kaya ang mga batakang produkto alang sa mga katawhan.
