BUTUAN CITY – Gipaneguro ni Agriculture Secretary Francisco Tiu Laurel Jr. nga nagpabiling lig-on ang suplay sa bugas sa nasud bisan pa sa pagsaka sa presyo sa lana ug gasto sa agrikultura tungod sa tensyon sa Middle East.
Sumala sa hepe sa Department of Agriculture, ang posibleng 20% nga pagkunhod sa produksyon sa palay giisip lamang nga “worst-case scenario,” ug dili gilauman nga mahitabo tungod sa mga lakang nga gihimo sa gobyerno.
Gitin-aw usab sa opisyal nga nakabenepisyo ang Pilipinas sa igo nga global rice supply, ilabi na gikan sa mga dagkong exporters sama sa India ug Vietnam nga karon anaa sa peak harvest season.
Dugang pa niini, hapit na mapuno ang mga pondohanan sa National Food Authority, nga nagsilbing buffer stock sa nasud.
Nag-gahin usab ang DA og 10 bilyones pesos nga assistance package alang sa mga mag-uuma ug mangingisda, apil na ang fuel subsidies ug uban pang targeted interventions, nga dunay prayoridad ang produksyon sa bugas.
Andam usab ang gobyerno nga magdugang og hangtod P20 bilyon para sa farm inputs ug P10 bilyon alang sa tabang sa fisherfolk aron mapadayon ang ilang panginabuhian.
Gipalambo usab sa DA ang paggamit sa mga alternatibong solusyon sama sa biofertilizers aron maminusan ang pagsalig sa mahal nga agricultural inputs.
