BUTUAN CITY – Gipadayag ni Ramil Madriaga nga gisulti matud pa ni Kanhe Pangulong Rodrigo Duterte nga magpatuman og sabotage operations batok kang Antonio Trillanes IV, apan nagduha-duha sa pagmando og asasinasyon tungod sa koneksyon ni Trillanes sa militar.
Sumala pa niini nga sa panahon sa pagkapangulo ni Duterte, gi-assign siya isip usa ka counter-intelligence agent ubos sa National Security Council.
Bisan pa man niini, iyang gipasabot nga dili siya direktang sakop sa Office of the President o sa ubang ahensya sa gobyerno, kundili direkta siyang gi-employed sa kanhi pangulo.
Gisultihan matud pa siya ni Duterte nga bantayan, operisyunan ug isabotahe si Trillanes.
Gidugang ni Madriaga nga nagduha-duha si Duterte sa paghatag og mando sa asasinasyon batok kang Trillanes tungod sa suporta ug koneksyon niini sulod sa Armed Forces of the Philippines.
