BUTUAN CITY – Miani og dakong batikos si U.S. President Donald Trump human siya nag-post og AI-generated nga hulagway nga murag “Jesus-like figure,” sa wala pa niya kini gi-erase sa iyang social media platform nga Truth Social.
Ang hulagway gipagawas dungan sa iyang bag-ong pagbatikos kang Pope Leo XIV, nga iyang gitawag og “weak on crime” ug “terrible for foreign policy.”
Sa AI image, makita si Trump nga nagsul-ob og puti nga robe ug murag nagtambal og usa ka tawo.
Naghupot usab siya og nagadan-ag nga orb, samtang sa background makita ang mga simbolo sama sa Statue of Liberty, agila, ug mga fighter jets.
Nag-viral ang post ug nakaangkon og daghang kritisismo, bisan gikan sa pipila ka konserbatibong grupo nga mosuporta kaniya ug sa ubang iladong personalidad sa conservative circles.
Gibutyag sa mga niini nga dili angay nga himuong “religious figure” ang usa ka politiko.
Ang ubang kritiko mibutyag usab nga ang ingon-ani nga post mahimong makaapekto sa relasyon ni Donald Trump sa religious right, nga usa sa mga hinungdan sa iyang kadaogan sa eleksyon.
Ang White House nagpabiling hilom bahin sa insidente, samtang ang post gikuha na gikan sa account ni Trump.
