BUTUAN CITY – Nakabaton og kataw-anan nga “clumsy moment” ang aktres ug host nga si Anne Curtis human siya makig-hinabi sa mga Hollywood stars nga sila Anne Hathaway ug Meryl Streep kabahin sa gihulat nga pelikula nga The Devil Wears Prada 2.
Atol sa maong interview, aksidenteng natandog ni Anne Curtis ang mikropono nga dayon nahulog sa salog.
Imbis nga maulaw, iyang gipakataw-an ang sitwasyon ug mibutyag nga mura kini og “Andy Sachs moment,” nga nagtumong sa karakter ni Hathaway sa orihinal nga The Devil Wears Prada nga nailhan usab sa iyang pagka-clumsy.
Gipa-ambit ni Curtis, nga dako ang iyang kakulba sa wala pa ang interbyu, apan napulihan kini sa init nga pagdawat gikan sa mga Hollywood stars.
Sumala pa niini nga usa kini ka “dream interview” ug dako kaayo niyang kalipay nga nakaistorya niya sila Hathaway ug Streep.
Sa maong higayon, gihisgutan usab ang impluwensya sa unang pelikula, ang personal nga fashion icons sa mga aktres, ug ang pangutana kung unsa ang mahimong kinabuhi ni Miranda Priestly kung naa na siyay social media.
Naghatag usab si Anne og mensahe alang sa karakter nga si Andy Sachs.
Apil usab sa pagbalik sa sequel sila Stanley Tucci ug Emily Blunt, samtang mopakita usab si Simone Ashley sa pelikula.
Nakatakdang ipasalida sa mga sinehan ang The Devil Wears Prada 2 karong Abril 29, 2026. Sumala sa report, apil usab sa pelikula ang pipila ka mga eksena nga gikuha sa Milan, Italy.
