BUTUAN CITY – Gipaneguro ni House Deputy Speaker ug La Union Rep. Paolo Ortega nga magpadayon ang pagdungog sa House Committee on Justice kabahin sa impeachment batok kang Vice President Sara Duterte bisan pa sa mga petisyon nga gisubmite sa Korte Suprema.
Sumala ni Ortega, dili awtomatikong mapahunong sa mga petisyon ang proseso gawas kung adunay mando gikan sa SC sama sa temporary restraining order (TRO).
Gibutyag niini nga nagsunod ang komite sa Konstitusyon, House rules, ug ebidensya.
Ang komite nagpabiling lig-on ug magpadayon base sa Konstitusyon, mga lagda, ug ebidensya nga anaa sa ilang atubangan.
Dugang pa sa kongresista, ipadayon ang mga pagdungog sumala sa iskedyul isip kabahin sa mandato sa Kamara ug aron hatagan og higayon ang Bise Presidente nga mapanalipdan ang iyang kaugalingon.
Giklaro usab ni Ortega nga ang proseso nagtutok sa due process ug patas nga pagdinig alang sa tanang panig.
