BUTUAN CITY – Nagpagawas og subpoena ang House Committee on Justice alang sa mga “sobre” nga matud pa gigamit sa pagbutang sa kwarta nga nadawat matud pa sa kanhing opisyal sa Department of Education (DepEd) gikan kang Vice President Sara Duterte.
Gilauman nga ipresentar ang maong mga sobre sa impeachment proceeding karong Abril 14.
Mahinumduman nga sa imbestigasyon sa House Committee on Good Government and Public Accountability niadtong 2024 kabahin sa confidential funds sa bise presidente, gipadayag ni kanhing DepEd Usec. ug kaniadto lider sa Procuring Entity o HOPE nga si Gloria Mercado nga nakadawat siya og mga sobre gikan kang kanhing DepEd Asec. Sunshine Fajarda.
Sumala pa ni Mercado, ang mga sobre matud pa gikan kang VP Duterte tali sa Pebrero 2023 hangtod Septiyembre 2023, ug nakadawat siya og siyam ka sobre nga adunay marka nga HOPE.
Tungod niini, sa subpoena sa Justice Committee, gimandoan si Marivic Pareja, director sa House of Representatives Legislative Archives and Museum Management Service, nga ipagawas ang mga rekord lakip ang mga materyales nga nalambigit kang Mercado para sa impeachment proceeding sa Abril 14.
Apil sa gipangayo sa komite ang affidavit ni Mercado ug ang maong mga sobre.
Gipangayo usab sa Justice Panel ang mga transcript ug video recordings sa Blue Ribbon Committee sa Kamara gikan sa Septiyembre 2024 hangtod Nobyembre 2024.
