BUTUAN CITY – Nakig-alayon na ang Department of Energy (DOE) sa Philippine Competition Commission (PCC) aron imbestigahan ang alegasyon sa posibleng kunsabuhay kon cartelization sa sinemanang pagtaas sa presyo sa lana.
Sumala ni Energy Secretary Sharon Garin, angay nga susihon kung adunay nahitabo nga “anti-competitive behavior” tali sa mga kompanya sa lana, ilabina nga pareho ug dungan ang gidugang nga presyo.
Andam ang DOE nga usbon ug repasohon ang sistema sa sinemanang price adjustment, uban sa giya gikan sa Kongreso.
Gipasalig usab ni Garin nga ang kataas sa presyo sa lana sa tibuok kalibutan mao ang nag-unang hinungdan sa pagtaas sa presyo niini sa local market, apan andam ang DOE nga mohatag sa gikinahanglan nga datos ngadto sa PCC alang sa mas lawom nga imbestigasyon.
Sigon sa kalihim, ang pagtino sa bisan unsang paglapas anaa sa PCC ug kinahanglan nga mosunod sa hustong proseso.
Sa samang higayon, gibutyag ni Garin nga andam ang DOE nga ibulgar ang pangalan sa mga kompanya sa lana kung mapamatud-an nga nagtinabangay sila sa presyo.
