BUTUAN CITY – Nanawagan si boxing legend ug kanhi senador nga si Manny Pacquiao sa mga lider sa kalibutan nga hatagan ug oportunidad ang kabatan-onan alang sa mas maayong kaugmaon atol sa miting sa United Nations ning adlawa Huwebes.
Sa “Sports for Peace and Development: Leveraging Sport for Youth Empowerment and Prevention of Violent Extremism” nga gipangunahan sa UN, gibutyag ni Pacquiao nga daghang kabatan-onan sa kalibutan ang nag-atubang ug kalibog ug kakulang sa oportunidad.
Kini ilabina nga nagpadayon ang kapobrehon ug dili patas ang mga oportunidad.
Sa daghang lugar, ang kabatan-onan wala’y direksyon, huyang sa kasamok, krimen, ug ekstremismo kansa dakong hagit nga iyang nakita.
Dinhi na dayon gihimong ehemplo ni Pacquiao, ang iyang nakab-ot karon gikan sa pagka-walang wala niadtong bata pa siya ug nagpuyo sa kadalanan sa General Santos City.
