BUTUAN CITY – Gipalig-on sa Department of Health (DOH) ug sa United States State Department ang ilang pagtinabangay aron mapakusgan ang kampanya batok sa tuberculosis kon TB dinhi sa Pilipinas, ilabina ang mas sayo nga pag-detect ug mas daghang mahatagan og tambal.
Sumala sa DOH, naghatag ang Estados Unidos og mga importanteng gamit sa panglawas, lakip na ang tambal alang sa 230,000 ka mga pasyente ug 12 ka ultraportable X-ray machines aron magamit sa mga layo nga lugar. Kini nga tabang kabahin sa kasabutan sa duha ka nasod aron mas mapalambo ang panglawas sa mga Pilipino.
Ang portable X-ray makatabang sa sayo nga pag-detect sa sakit, ilabina sa mga lugar nga wala’y dagkong ospital.
Samtang ang tambal makatabang aron masiguro nga padayon ang pagtambal sa daghang pasyente. Tumong niini nga panagtinabangay nga mawagtang ang TB kansa hulga sa panglawas sa publiko.
