BUTUAN CITY – Misaka sa 10 ka tawo ang namatay ug daghan pa ang nasamdan human sa usa ka airstrike sa Israel duol sa usa ka eskwelahan nga gigamit isip kapuy-an sa mga mihikling nga Palestino niadtong Lunes, sumala sa mga opisyal sa panglawas.
Nahitabô ang pag-atake sa sidlakang bahin sa Maghazi refugee camp sa sentrong Gaza Strip, diin adunay kagubot una tali sa mga residente ug usa ka militia nga gisuportahan sa Israel nga misulay og kidnap sa pipila ka tawo.
Sumala sa mga saksi ug mga medic, mipabuto ang Israeli drones og duha ka missile nga miigo sa maong komunidad nga gipuy-an sa mga displaced residents.
Sa laing insidente, usa usab ka Palestino ang namatay ug usa ka bata ang nasamdan human maigo sa airstrike samtang nagsakay og motorsiklo sa Gaza City.
Usa pa ka Palestino ang napatay dihang gipusil sa Israeli forces ang usa ka sakyanan sa central Gaza, nga nagpataas sa kinatibuk-ang gidaghanon sa mga namatay ngadto sa dili moubos sa 12 sa maong adlaw.
Wala pay opisyal nga pahayag ang Israeli military kabahin sa mga insidente.
Samtang padayon ang pagbinasolay tali sa Hamas ug Israel kabahin sa mga paglapas sa nagpadayong hunong pinusilaynga gisuportahan sa Estados Unidos.
Sumala sa Gaza health ministry, dili moubos sa 700 ka tawo ang namatay tungod sa pagpamomba nga gihimo sa Israel sukad nagsugod ang ceasefire.
Sa panig sa Israel, upat sa ilang mga sundalo ang napatay sa mga militante sa parehas nga panahon.
Nagpadayon ang bag-ong kapintas samtang nagpadayon ang tensyon sa isyu sa pag-disarm sa Hamas, usa ka dakong babag sa sunod nga hugna sa peace plan nga giduso ni U.S. President Donald Trump.
