BUTUAN CITY – Gipahayag sa Department of Justice nga padayon pang gisusi sa prosekusyon ang mga reklamo nga giimbestigahan batok kang Jinggoy Estrada ug Bong Revilla Jr..
Sumala kang Justice Spokesperson Atty. Polo Martinez, ang reklamong plunder batok kang Jinggoy Estrada “under review” pa sa buhatan ug gipaabot ang resolusyon.
Ang kaso gi-file sa National Bureau of Investigation may kalabotan sa giingong maanomalyang flood control projects.
Gipasabot sa tigpamaba nga ang “under review” nagpasabot nga “submitted for resolution” na kini apan padayon pang gitun-an sa prosekusyon.
Human mafinalize ang resolusyon, isumite dayon kini sa Office of the Ombudsman.
Anaa na sa Ombudsman ang hurisdiksyon tungod kay ang posisyon sa senador mas taas sa salary grade 27.
Bisan pa man nga adunay isumiteng resolusyon ang Department of Justice, maghimo gihapon og lahi nga evaluation ang Office of the Ombudsman sa maong kaso.
Gikumpirma usab nga “submitted for resolution” na ang reklamong plunder batok kang Bong Revilla Jr. ug gilauman nga mogawas ang resolusyon karong bulan sa Abril.
Bisan niini, giila sa Department of Justice nga ang Office of the Ombudsman gihapon ang magdesisyon kung kini ba dal-on isip pormal nga kaso ngadto sa korte.
