BUTUAN CITY – Nanawagan ang Department of Health sa mga biyahero ug sa mga motambong sa tinuig nga Visita Iglesia nga siguruhon nga kompleto ang ilang dalang proteksyon ug medical supplies aron malikayan ang bisan unsang sakit karong paghandum sa Semana Santa.
Sa pinakabag-ong pahimangno sa ahensya, hugot nilang gitambagan ang publiko nga mag-andam sa posibleng epekto sa kadaghan sa tawo ug kahimtang sa panahon.
Girekomenda sa ahensya ang pagdala og igo nga tubig aron malikayan ang dehydration, ingon man payong ug personal nga mga tambal.
Gawas pa niini, gipahinumduman usab sa Department of Health ang katawhan nga magdala og snacks, ekstrang sinina, ug pamaypay o portable fan isip panalipod batok sa grabe nga kainit sa panahon.
Gipagawas ang maong pahimangno aron masiguro ang kaluwasan sa mga Pilipino nga gilauman nga modagsa sa mga simbahan ug mga terminal.
Isip dugang nga pag-amping batok sa mga makatakod nga sakit ug posible nga pinaakan sa lamok, gipasiugda sa ahensya ang kamahinungdanon sa pagdala og insect repellant, alcohol, ug face mask ilabi na sa mga pampublikong lugar nga daghan og tawo.
Samtang aron masiguro ang paspas nga responde kung adunay wala gilaumang insidente, gipahinumduman pag-usab sa Department of Health ang katawhan sa mga lakang pang-emerhensya.
