BUTUAN CITY – Gitaho sa Bangko Sentral ng Pilipinas (BSP) nga posibleng mosaka ang inflation tali sa 3.1 hangtod 3.9% karong buwana sa Marso tungod kay ang pagsaka sa presyo sa lana, bugas, ug kuryente, ka-uban sa pagkunhod sa bili sa piso, maoy nakapadugang sa pagsaka sa mga palaliton.
Samtang, ang mas ubos nga presyo sa utanon, isda, ug karne nakatabang aron mapabiling ubos ang inflation. Niadtong Pebrero, miabot ang inflation sa 2.4%, nga gipakusog sa mas taas nga presyo sa pagpuyo ug pagkaon.
Niadtong panahona, gibutyag na ni National Statistician Dennis Mapa nga posible pang musaka ang inflation sa umaabot nga mga bulan tungod sa krisis sa tunga-tungang Sidlakan.
Ning miaging semana, gilauman sa BSP nga moabot sa average nga 5.1% ang inflation sa 2026 tungod sa epekto sa taas nga presyo sa lana human sa gubat sa tunga-tungang Sidlakan.
Kini nga projection mas taas kaysa sa naunang forecast ug mas taas usab sa target sa gobyerno nga 2 hangtod 4 porsyento.
