BUTUAN CITY – Nakasinati og mental health problem ang ubang mga Oversea’s Filipino Workers kon OFW sa United Arab Emirates kon UAE particular sa Abu Dhabi.
Sigon ni Bombo International News Correspondent Nicole Bedtao direkta gikan sa Abu Dhabi sukad pagsugod sa giyera, pabiling normal ang sitwasyon sa maong siyudad sama sa walay pagsaka sa presyo sa mga palaliton o produktong lana samtang dunay trabaho pa gihapon.
Apan alang kanilang mga OFW, daghan na ang nagkaproblema sa mental health ilabina kanila nga dool sa US Airbase diin maoy target sa mga pagpamomba.
Dili matud pa kalikayan nga mobati sila og anxiety tungod sa daw walay katapusang mga buto nga ilang madungog diin tungod sa kakusog, mauyog ang ilang mga higdanan.
Gane, dunay adlaw nga muabot sa 30 ka missiles ang mo-atake sa maong siyudad.
Apan gibutya ni Bedtao nga naningkamot sila nga malagpasan nila ang sitwasyon tungod kay dili man sayun nga makapauli tungod kay kinahanglan nimung bayaran ang gasto sa imong employer nga anaa sa 200-mil pesos isip refund.
Hinoon gipaneguro sa gobyerno sa Abu Dhabi nga luwas ang katawhan diin gitambagan silang dili mogawas-gawas sa panimalay.
Apan duna gihapon matud pay nakalas nga kinabuhi human nahagbongan sa mga debris.
