BUTUAN CITY – Human ang pito ka semanang pagpakahilom, nagpagawas na sa iyang panig si Norwegian Crown Princess Mette-Marit pinaagi sa usa ka interview sa national TV kondiin iyang gipanghinaot nga unta, wala na lang niya maka-ila ang namatay nga American sex offender nga si Jeffrey Epstein.
Nagpagawas na sa iyang panig ang prinsesa human nabulgar ang kadaghan sa ilang koneksyon pinaagi sa pagbinayluay nila og email si Epstein, tali niadtong tuig 2011 ug 2014 kondiin nakapuyo pa siya sa balay ni Epstein sa Florida bisan wala didto si Epstein.
Sa 20-minutos nga interview, gipadayag ni Princess Mette-Marit nga nabati niya nga gi-manipulate siya dayong pasabot nga kung gi-manipulate ang usa ka tawo, dili dayon kini ma-realize gikan sa sinugdan kondiin hapit na siya mohilak.
Nangayo na siya og pasaylo ug mi-angkon nga bati ang iyang paghukom, human mahibaloan ang kalalom sa iyang koneksyon kang Epstein dihang gipagawas ang milyones nga mga dokumento sa US Justice Department sa katapusan sa Enero.
