BUTUAN CITY – Ang Japanese nga coastal containership operator nga Imoto Lines nag-operate og pipila ka feeder vessels nga adunay talagsaong hitsura nga inspirasyon gikan sa atubangang bahin kon ilong sa dagkong passenger airplanes.
Niadtong 2015, ang Kyokuyo shipyard sa Yamaguchi, Japan, nakakompleto sa unang SSS-feeder (Semi-Spherically Shaped-feeder) nga gi-commission sa Imoto Lines.
Usa kini sa pinakadakong feeder vessels nga nahimo sa Japan, apan ang nakapalahi gyud niini mao ang iyang dili kasagarang disenyo. Ang 600-TEU nga barko nga Natori adunay hemispherical nga bow nga pareho kaayo sa ilong sa usa ka dako nga Airbus passenger jet—usa ka ideya nga wala pa gyud gisulayan kaniadto.
Apan dili lang kini pangpa-nindot tungod kay adunay kini praktikal nga benepisyo nga nakahatag sa Natori og titulo nga “Ship of the Year” gikan sa Japan Society of Naval Architects and Oceanographers, ingon man daghang uban pang awards sa small cargo vessel category.
Ang lingin nga porma sa atubangan, makapaminos sa air resistance hangtod sa 50% kumpara sa tradisyonal nga barko, nga makatabang sa pagdaginot sa fuel ug pagkunhod sa makadaot nga emissions.
Tungod sa dako kaayong kalampusan sa unang barko nga adunay ilong nga murag eroplano, nagpa-commission pa ang Imoto Lines og duha ka susama nga barko.
Niadtong 2018, ang Nagara nadugang sa ilang fleet, ug niadtong 2022, gilunsad ang mas dako nga S-562 Nogami nga adunay kapasidad nga 670 TEU.
