BUTUAN CITY – Bag-o lang nakit-an sa bukirang bahin sa Taiwan ang pinasahing suba tungod kay dili man tubig ang midagayday niini kondili mga labod rason nga gibansagan kining ‘Millipede River.’
Nadiskubrehan kini sa tour guide nga si Yang Xiaozhong, kinsa 11 ka tuig nang nagtrabaho ug maoy nakabantay nga ang dalan nga iyang na-agi-an murag natabunan og dahon.
Sa pagtan-aw niya pagduol, dinhi niya nasuta nga mga millipedes diay kon mga labod kini— kansa nagalihok sa parehas nga direksyon nga kung tan-awon sa distansya, mura’g usa ka suba.
Mi-abot sa upat ka metro ang gilapdon niini ug kapin sa 50 ka metro ang gitas-on nga kung imong makita, magpakurog sa imong ka-unuran.
Human mikatag ang video sa social media, daghang tawong nagtawag sa parke aron mangutana kung normal ba kini o timaan sa linog.
Ang parke nagpahibalo nga kini usa ka natural nga panghitabo tungod sa kausaban sa panahon o palibot, ug nangayo og pasaylo tungod sa kalisang nga namugna niini.
