BUTUAN CITY – Gibasol karun sa Taliban government ang pag-kamatay sa dinosena katawo lakip na ang nasamdan sa drug treatment centre sa Kabul, Afghanistan human naigo sa usa ka air strike.
Apan hugot nga gilimod sa Pakistan ang pasangil dayung butyag nga ilang gitarget lang ang mga military installations ug “terrorist support infrastructure” sa Kabul ug pipila ka parte sa lugar sa Nangahar.
Sumala sa taho nagpabiling nasunog ang ubang parte sa ospital og dunay kapin 30 ka patay’ng lawas na ang napagawas gikan sa nasunog nga ospital.
Sumala pa kadumalahan sa ospital posibleng dunay gatusan pa nga biktima gikan sa halos 2-mil ka pasyenteng gitambalan ang naapektuhan.
Gibutyag sa tigpamaba sa Afghan Health Ministry, nga walay mga pasilidad sa militar ang gitukod sa palibot sa ospital.
Sumala sa mga residente sa lugar nga nakadungog sila og kusog nga pagbusikad sa Kabul human sa kabanha sa mga eroplano ug air defense system.
Nasayran nga subling misamot ang tensyon tali sa Afghanistan ug Pakistan bag-ohay lang human gi-akusahan sa Pakistan nga naghatag og shelter ang Afghanistan sa mga militanteng grupo, butang nga gihimakak sa Taliban.
Base sa United Nations Assistance Mission in Afghanistan (UNAMA), sukad niadtong Pebrero 26, 2026, 75 katawo na ang mga namatay ug dunay 193 ang nasamdan tungod sa padayon nga giyera sa utlanan sa duha ka nasud bisan og dunay nagtunay nga ceasefire niadtong Oktubre, 2025.
