BUTUAN CITY – Gi-report sa Department of Energy (DOE) nga padayon ang paglambo sa electric vehicle industry sa Pilipinas human nga dul-an 400 ka mga electric vehicles kon EVs na ang narehistro ug nakatuman sa mga patakaran sa Vehicle Fuel Economy Labeling Program (VFELP).
Pinakadaghan niini mao ang Battery Electric Vehicles (BEVs) nga kapin sa 200 kansa gisundan sa kapin 100 ka Hybrid Electric Vehicles (HEVs). Gisiguro usab sa DOE nga padayon ang ilang suporta sa EV industry.
Sa pagkakaron, adunay 1,511 ka mga charging points sa lain-laing dapit sa Pilipinas; kapin sa 740 niini ang AC charging points kondiin ang bayad sa pag-charge nagpabilin sa ₱23.71 sa matag-kilowatt hour.
Aduna usa’y kapin sa 250 ka mga operator, suppliers, ug service providers nga naglihok sa EV sector sa nasud.
Ang halin sa EVs gilauman nga musaka pa tungod sa krisis sa petrolyo nga nagpadayon tungod sa giyera sa Gitnang Silangan tungod kay mahimo man kining usa ka alternatibo aron maminusan ang pagsalig sa imported nga lana.
Positibo usab kini nga kalamboan alang sa ekonomiya sa Pilipinas.
