BUTUAN CITY – Gi-deploy na ang 2,500 ka mga American Marines nga sakop sa Marine Expeditionary Unit didto sa Strait of Hormuz – usa ka kritikal nga agi-anan sa kalibutan diin mu-agi ang halos 20% sa suplay sa lana.
Tumong niini aron palig-unon ang seguridad sa rehiyon tungod sa pagtaas sa tensyon nga mugna sa mga pag-atake sa Iran batok sa barkong pang-pamatigayon kondiin ang deployment naglakip sa mga barko sa USS Tripoli Amphibious Ready Group ug uban pang warships.
Aprubado ang maong deployment ni U.S. Defense Secretary Pete Hegseth aron malikayan ang bisan unsa pang kalihokan nga makapugong sa agi-anan nga maoy rason sa grabeng pagsaka sa presyo sa lana.
Naghatag usab kini og geopolitical risk tungod kay ang maong deployment nagpakita nga mas direkta na ang military involvement sa U.S. ug posibleng sinugdanan na usab sa ground invasion batuk sa Iran.
