BUTUAN CITY- Gikompirma sa Qatar Ministry of Defense nga nakasinati ang nasud og missile attack kagahapon Huwebes, Marso 5, samtang aktibong gi-intercept kini sa ilang air defense systems.
Tungod niini, nanawahan ang gobyerno sa mga katawhan, residente ug mga langyaw nga magpabilin nga kalmado, mosunod sa opisyal nga mando, likayan ang pagpakaylap og sayop nga impormasyon ug mo-sunod lang sa impormasyon gikan sa government officials.
Kahinumdumang una nang gibutyag sa Qatar niadtong martes nga dili lang military facilities ang gitarget sa Iran kundi ang tibuok teritoryo sa Qatar lakip na ang Hamad International Airport ug mga gas facility.
Sumala sa mga otoridad nakapahagsa pa sila og duha ka Iranian fighter jets nga mingsulod sa ilang airspace niadtong Lunes. Sigon sa tigpamaba sa foreign ministry nga si Majed Al-Ansari nga ang pag-atake nakalapas na sa tanang “red line” ug andam ang nasud nga buhaton ang tanang lakang aron protektahan ang soberanya.
Gipunting usab niini, nga ang kaluwasan sa mga katawhan nga naglangkob sa kapin 140 ka nasyonalidad mao ang labing prayoridad. Sa pagkakaron, sirado ang airspace sa Qatar ug kapin 8,000 ka transit passengers ang na-stranded samtang nagpadayon ang hulga sa bag-ong missile attacks.
