BUTUAN CITY – Kung maayo ang panahon ug wala’y dag-um, makita karong gabii sa tibuok Pilipinas ang usa ka talagsaong total lunar eclipse nga magsugod mga alas 7:04 sa gabii kansa gibana-banang mu-abot sa pinakataas nga peak sa alas 7:34 sa gabii, ug matapos sa alas 8:03 sa gabii, kon duna’y kinatibuk-ang gidugayon nga hapit 59 minutos.
Sumala sa Philippine Atmospheric, Geophysical and Astronomical Services Administration (PAGASA-DOST), ang lunar eclipse mahitabo kung ang kalibutan mu-agi tali sa adlaw ug sa bulan, busa ang landong mutabon sa bulan.
Sa panahon sa totality, mahimong pula ang kolor sa bulan, nga gitawag og “Blood Moon” tungod kay ang atmosphere sa kalibutan musala man sa kahayag gikan sa adlaw— rason nga mapugngan ang gamay nga blue wavelength ug mutumaw ang pulang kahayag nga makaabot sa Bulan.
Makita ang total eclipse dili lamang sa Pilipinas kundili usab sa East Asia, Australia, Central Pacific, ug kadaghanan sa Americas. Gipasabot usab sa mga eksperto nga walay angay kahadlokan sa gitawag nga Blood Moon, sukwahi sa mga karaang tinu-uhan nga naglangkob niini sa dautang panghitabo.
Ang maong hitabo usa sa mga pinakaginahulat nga astronomical events sa tuig.
