BUTUAN CITY – Usa ka kabayo nga ginganlan og “Fancy” ang opisyal nga giila sa Guinness World Records isip Pinakatigulang nga buhing kabayo sa tibook kalibutan nga muabot sa makabilib nga edad nga 37 ka tuig.
Nalabwan ni Fancy ang kanhe record nga gihawiran sa usa ka kabayong namatay sa edad nga 38-anyos.
Sumala sa tag-iya niini nga si Paige Sigmon Blumer, nagsugod ang ilang lawom nga panag-uban niadtong late 90s. Nailhan kaniadto sa 8-anyos nga si Paige si Fancy nga 12-anyos usab sa usa ka training facility.
Naagni gelayon ang bata sa kaisog ug kakusgan sa kabayo ilabina sa dihang nasayran niini nga giluwas ni Fancy ang asawa sa kanhe trainer gikan sa milupad nga sin niadtong kusog ang bagyo.
Sukad nga gipalit siya sa pamilya ni Paige niadtong tuig 2000, nahimong permanenteng miyembro na siya sa ilang pamilya.
Isip usa ka American Quarter Horse, kasagarang muabot lang sa 25 hangtud sa 35 ka tuig ang kinabuhi sa kaliwat ni Fancy apan tungod sa maayong pag-atiman, tukmang nutrisyon ug regular nga pag-checkup sa mga beterinaryo, nalabwan niya ang iyang life expectancy.
