BUTUAN CITY – Gikumpirma sa Qatar, Kuwait ug sa United Arab Emirates kon UAE nga gisira na ang ilang mga airspaces human gibombahan sa Iran ang mga assets sa Estados Unidos nga anaa sa kinatibuk-ang Gulf Arab states isip panimalos sa hini-usang combat attacks nga gihimo sa Israel ug Estados Unidos ngadto sa ilang nasud kaganinang hapon – oras sa Pilipinas.
Gikumpirma sa Iranian government nga ilang gi-atake ang pipila ka mga targets apil na ang anaa sa Bahrain, Kuwait, Qatar ug sa United Arab Emirates, diin na-locate ang mga US air bases.
Gipadayag sa Islamic Revolutionary Guard Corps kon IRGC sa Iran nga ang tanang Israeli ug US military targets sa Middle East, gitiro na nila gamit ang gamhanang mga Iranian missiles kansa magpadayon matud pa hangtud nga ila nang mapildi ang ilang mga kaaway.
Ang tanan usab nga mga US assets sa tibuok rehiyon, gikonsidera nilang mga legitimate targets kondiin sa ilang pinaka-ulahing monitoring, usa na ka tawo ang patay sa Abu Dhabi, ang capital sa United Arab Emirates kon UAE bisan pa man nga na-intercept ang pipila ka mga missiles nga ilang gitira.
Samtang gipadayag usab sa Bahrain nga usa ka missile attack ang mi-target sa headquarters sa the US Navy’s 5th Fleet, nga anaa sa ilang teritoryo kondiin gitawag kini sa ilang kagamhanan nga minaro nga pag-atake ug usa ka klarong kalapasan sa sobereniya ug seguridad sa ilang gingharian.
Duna usa’y na-report nga mga pagpamomba sa Kuwait, diin nahimutang ang Central Command headquarters.
Sa Qatar, gipadayag sa Defense Ministry nga ilang napugngan ang pipila ka mga pag-atake sa ilang nasud gamit ang pre-approved security plan, ug ang tanang mga missiles, na-intercept adiser kini naka-abot sa ilang teritoryo.
