BUTUAN CITY – Usa matud pa ka lame excuse ang pagtawag ni Atty. Nicholas Kaufman nga hyperbolic lang ang mga kontrobersyal nga pamahayag kaniadto ni kanhe Pangulong Rodrigo Duterte.
Sa pakighinabi sa Bombo Radyo Philippines kang Southern Illinois University Graduate Program Director Dr. Raymund Narag, gibutyag niini nga usa lang ka palusot ang pagtawag ni Kaufman nga hyperbolic o exaggeration sa mga public speech kaniadto ni Duterte.
Wala matud pay lig-on nga napakita si Kaufman batuk sa mga ebidensiyang giatubang sa International Criminal Court kon ICC prosecution panel, ilabina ang paggamit sa mga pamahayag sa kanhe pangulo.
Gipalusot na lang sa abogado isip exaggerations ang mga kontrobersyal nga pamahayag, bisan og nagsilbi ang mga niini extra-judicial confessions.
Gibalikan ni Dr. Narag kung giunsa pagdawat sa publiko ang mga nasangpit nga pamahayag, ilabina niadtongg nangapanya pa lang si Duterte sa pagkapangulo.
Matud pa niini, gigamit sa mga pulis ang mga pronouncements sa pangulo isip giya sa ilang trabaho ug sa pagpatuman sa kampanya kontra ilegal nga droga, bisan og kini sukwahi sa moralidad ug sa balaod.
Karun anaa sa puntong gisingil na si Duterte gipamugos sa iyang kampo nga usa lang ka exaggeration ang tanan bisan og nagresulta na sa halapad nga pinatyanay.
Sa dihang napangutana ang US-based criminal justice expert kung nganung daghang pulis pa gihapon ang mituman sa dugoong drug war, gibutyag niining segurado nga duna usab silay pagduha-duha niadtong gipatuman ang kampanya.
Daghan matud pa ang hingpit nang mihawa sa serbisyo tungod kay dili na matulon ang mga nahitabong patay base na usab sa rekord sa gobyerno samtang ang uban boluntaryo na usab nga nagpa-ambit sa ilang kasinatian sa nakalabay nga administrasyon.
