BUTUAN CITY – Mibaha ang pahasubo sa pagtaliwan sa award winning singer nga si Neil Sedaka nga mitaliwan sa edad nga 86-anyos.
Gikumpirma sa pamilya ang kalit nga pagtaliwan sa ilang gimahal nga bana, amahan og lolo, nga gibansagang usa ka tinood nga alamat sa rock and roll.
Si Sedaka nailhan sa iyang mala-boyish nga tingog nga nagpasikat sa iya niadtong unang parte sa rock ‘n’ roll.
Lakip sa iyang mga sikat nga kanta mao ang “Breaking Up Is Hard to Do”, “Laughter in the Rain”, ug “Calendar Girl”.
Nakabaton siya og duha ka dekada nga pagkasikat, una niadtong 1960s ug subling misikat niadtong 1970s, nga nagpadayon sa iyang kamaayo isip singer og tigsulat og kanta.
Sumala sa pamahayag sa pamilya, si Sedaka dili lang inspirasyon sa milyones nga fans kundi usa ka makabilib nga tawo nga hilabihang gika-mingawan sa mga nakaila kaniya sa personal.
Wala pay gipagawas nga detalye mahitungod sa hinungdan sa iyang kamatayon.
