BUTUAN CITY- Porma sa pormalidad ang gi-ingong sayong pag-anonsyo ni Vice President Sara Duterte nga modagan kini pagka Presidente karung 2028 Presidential Election. Sumala ni Jeffrey “Ka Eric” Celiz, Secretary General sa Bangon Sambayanan, nga usa ka “formality of announcement” ang maong pag-ansunsyo tungod kay ang pagka Presidente sa nasud ni Sara, gitugyan na kani-adto sukad palang sa 2022, apan gihatag niya kini ang maong oportunidad kang Ferdinand Marcos Jr. kansa kasamtangang Presidente sa Pilipinas.
Gibutyag pa ni Celiz, nga si Duterte mao ang frontliner ug front runner sa tanang serbisyo sa wala pa siya mihatag og dalan ug suporta kang Marcos. Sa iyang panan-aw, ang pagkapangulo ni Duterte usa ka kapalaran nga daan nang gisulat, ug ang maong anunsyo karon usa lamang ka pormal nga pagpasabot sa iyang tinuod nga destinasyon sa politika.
Dugang pa ni Jeffrey Celiz, nga bisan pa man ipahayag o dili, si Duterte gihapon ang labing saligan ug adunay labing taas nga approval ug trust rating tali sa tanang opisyal sa gobyerno. Samtang si Presidente Ferdinand Marcos Jr., sa tunga pa lang sa iyang termino, nakasinati na og negatibong klase sa approval rating sa daghang serbisyo.
Gipadayag ni Celiz nga si Duterte nagpabilin nga consistent sa iyang pagserbisyo ug koneksyon sa katawhan, ug ang iyang deklarasyon nga ihalad ang kaugalingon, kinabuhi, ug kaugmaon alang sa pag-alagad sa nasud usa ka klarong timaan nga gusto niyang tubuson ang Pilipinas ug ibalik ang tinuod nga direksyon sa panggamghanan.
Sigon pa niini, nga ang mensahe ni Duterte nga “panahon na para ibalik nato ang tinuod nga ka-isog ug malasakit sa pamahalaan” nagpakita sa iyang determinasyon nga ipahiuli ang pamalaod ug pagserbisyo nga gikinahanglan sa katawhan nga nag-antos sa matag adlaw.
