BUTUAN CITY – Gitahasan ni Pangulong Ferdinand Marcos Jr si Department of Public Works and Highways kon DPWH Secretary Vince Dizon, nga mohimo og inspeksyon sa Kalayaan Island Group (KIG) sa West Philippine Sea.
Ang nasangpit nga direktiba maoy misunod sa pag-abli sa Kalayaan Municipal Tourism Office sa mga tour packages karung buwana.
Tumong sa pangulo nga makita sa secretary ang posiblidad sa pagtukod og mga airport ug pantalan aron mapaaayo pa pagsamot ang turismo sa lugar.
Gikumpirma ni Presidential Communications Undersecretary Claire Castro, nga nakaestorya sa Pangulo ang Kalihim mahitungod sa nasangpit nga hisgutanan.
Ang munisipilidad sa Kalayaan namugna tungod kay ang KIG nga anaa sa ilalom sa probinsiya sa Palawan pinaagi sa Presidential decree nga gipagawas kaniadto ni kanhe Pangulong Ferdinand Marcos Sr niadtong 1978.
