BUTUAN CITY – Nangayo og pasaylo ang usa ka Sangguniang Kabataan (SK) chairperson gikan sa Santa Cruz, Laguna human mikaylap sa social media ang iyang viral video diin makita nga iyang gihikap-hikap nga walay gloves ang mga pagkaon nga naka-display sulod sa usa ka convenience store.
Ang opisyal nga si Mark Adrian Napiza, SK chairperson sa Barangay Bubukal, nag-post sa iyang Facebook, kondiin iyang gi-angkon nga sayop ug dili angay ang iyang gibuhat, ilabina kay usa siya ka piniling opisyal sa kabatan-onan.
Aminado siyang ang iyang lihok sa maong video dili sakto ug dili angay — bisan pa og gihimo ko kini isip gara-gara ug kabahin sa iyang video content uban sa iyang mga higala ug wala’ ko’y dautang tuyo.
Dugang ni Napiza, gibayran niya ang tanang produktong iyang nahikapan sa maong adlaw apan aminado siyang mas lawom ang isyu kaysa sa yano nga pagbayad tungod kay ang isyu dili lang mahitungod sa pagbayad kundili sa hustong pamatasan ug sa imahe nga gipakita ug mahimong pagsabot sa publiko sa maong video content.
Gipaambit usab ni Napiza nga personal siyang nakig-istorya sa nagdumala sa tindahan aron mangayo og pasaylo sa pagkuha sa video nga walay pagtugot ug sa bisan unsang kasamok nga iyang nahimo.
Gi-delete na usab niya ang maong video human niya na-amgohan ang posibleng epekto niini sa publiko.
Dugang pa niya, nakadawat siya og sulat gikan sa SK Federation president ug napa-abot na usab ang maong isyu sa opisina sa Department of the Interior and Local Government (DILG) sa ilang lungsod.
Sumala ni Napiza, makigtambayayong siya sa mga hingtungdan ug andam siyang mudawat sa bisan unsang aksyon nga ipahamtang may kalabotan sa insidente.
