BUTUAN CITY – Nagpagawas ang Manila Regional Trial Court (RTC) Branch 52 og precautionary hold departure order (HDO) batuk kang Sen. Jinggoy Estrada ug uban pang respondents mahitungod sa giatubang nga kasong plunder ug uban pa.
Gawas kang Estrada, sakop usab sa nasangpit nga precautionary HDO sila kanhe Department of Public Works and Highways (DPWH) Secretary Manuel Bonoan, ug uban pang kanhe DPWH officials nga sila Roberto Bernardo, Gerard Opulencia, ug Henry Alcantara.
Sigon ni Department of Justice (DOJ) spokesperson Atty. Polo Martinez, sa nasangpit nga kamanduan nga dunay petsang Pebrero 10, gitahasan ni Presiding Judge Juan Rañola, Jr. ang Bureau of Immigration (BI) nga pug-ngan ang posibleng paggawas sa nasud sa mga nasangpit nga respondents ug iapil ang mga niini sa ilang Hold Departure List.
Pasabot pa niini nga base sa mga testigo ug mga supporting documents sa mga prosecutors, dunay probable cause aron toohan nga ang mga respondents mamahimong mosulay sa pagbiya sa nasud aron makalikay sa pag-aresto ug prosekusyon.
Pagklaro usab niini nga ang preliminary investigation sa kasong plunder lakip na ang sa graft, direct bribery ug corruption of public officers cases batuk kang Estrada, nag-ong-ong pa.
