BUTUAN CITY- Gisiguro sa National Maritime Council kon NMC ang pagpalig-on sa morale sa mga residenteng nagpuyo sa mga teritoryo sa Pilipinas nga direktang naka-atubang sa West Philippine Sea.
Kini subay sa kontrobersyal nga pamahayag ni Senador Rodante Marcoleta nga ‘i-give-up’ ang Kalayaan Island Group kon KIG tungod kini anaa na gawas sa Exclusive Economic Zone kon EEZ sa Pilipinas.
Sa exklusibong pakighinabi sa Bombo Radyo Philippines kang NMC Spokesperson Usec. Alexander Lopez, sigon niini nga gi-atiman na sa panggamhanan sa Pilipinas ang panginahanglanon sa mga residente aron masiguro nga adunay maayo ug kalidad nga panginabuhi ang mga niini taliwala sa pagkabuwag nila sa mainland Luzon. Sa pagkakarun, minghatag na usab matud pa sila og disenteng road network, mga eskwelahan, supply sa limpyo nga tubig, kuryente, ug uban pang importanteng serbisyo.
Kanunay usab matud pa nga gibisita sa gobyerno ang mga residente aron masiguro nga dili mo-ubos ang ilang morale taliwala sa talagsaong opinyon sa pipila ka Philippine officials kalabot sa ligal nga estado sa maong teritoryo.
Pagklaro pa sa NMC official, nga bisan paman lisod ang pag-adto sa lugar tungod sa limited access sa assets sa Armed Forces of the Philippines ug Philippine Coast Guard, nakamugna na usab matud pa ang local officials og epektibong transport system gikan sa mainland Palawan padulong sa KIG.
