BUTUAN CITY – Gi-imbestigahan na sa mga otoridad sa Bulgaria ang kaso sa usa ka cluster sa misteryosong kamatayon nga posibleng usa ka murder-suicide kansa nagpataas og daghang conspiracy theories tungod sa kakulang sa klarong impormasyon.
Kini human nakaplagan ang tulo ka patay nga lalaki duol sa usa ka lodge sa Petrohan Pass, Northwestern Bulgaria nga gika-report nga gisunog kondiin ang tanang mga biktima, pulos sakop sa usa ka non-government organization kon NGO nga naglihok sa wildlife protection.
Nakaplagan ang tulo pa ka patay’ng lawas nga gilangkuban sa duha ka lalaki ug usa ka 15-anyos nga bata, sulod sa usa ka camper van sa Mount Okolchitsa, mga 80 km gikan sa unang crime scene kondiin ang mga biktima, duna’y mga igo sa bala.
Sa kinatibuk-an, unom ka mga tawo ang patay sa duha ka insidente kondiin gitu-uhan sa mga otoridad nga kini usa ka murder-suicide o coordinated killings.
Ang prosecutor naghulagway sa kaso nga daw gikan sa serye nga “Twin Peaks” tungod sa kahiladman ug misteryo sa panghitabo.
