BUTUAN CITY- Gi-isyu na ang 18 ka mga bag-ong ruta sa Butuan City pinaagi sa City Transportation and Traffic Management Department (CTTMD) nga naghatag og Provisional Authority (PA) sa pipila ka mga tricycle cooperative aron legal nga makapamasahero sa ilang tagsa-tagsa ka ruta.
Pinaagi sa pag-isyu sa PA, opisyal nga gihatagan og otoridad ang mga cooperative sa pag-operate sa ilang na-assign nga ruta ilalom sa Tricycle Route Plan (TRP). Nagpasabot kini nga mas sistematiko, organisado, ug lig-on ang pagpatuman sa road safety ug kalidad sa serbisyo alang sa publiko.
Ang mga gi-aprubahang ruta naglangkob sa nagkalain-laing barangay sama sa Buhangin, Maguinda, Ampayon, Basag, Taligaman, Camayahan, Maug, Banza, Bobon, Libertad, Ambago, Masao, Villa Kananga, ug uban pa. Ang klarong paglatid sa mga ruta makatabang sa pagpaminus sa kalibog, kagubot, ug pag-overlap sa mga tricycle route.
Kini nga lakang dili lang kabahin sa regulasyon, apan usa usab ka paningkamot sa pagpalig-on sa kooperasyon tali sa city government ug mga transport cooperative.
Gidasig ang tanang driver ug operator nga magpadayon sa maayong pamatasan sa dalan, magpaka-responsable, ug unahon ang kaluwasan sa mga pasahero.
