BUTUAN CITY – Mag-alokar ang Department of Agriculture (DA) og ₱300 milyon karong tuiga aron palapdan ang climate-resilient farming sa mga high-value nga utanon sama sa kamatis, sili ug bell pepper aron pagpugong sa kanunay nga pagsaka sa presyo tungod sa epekto sa klima ug kalamidad sa suplay.
Ang pondo gamiton sa pagtukod og greenhouses, drip irrigation systems ug water-impounding facilities aron mapalambo ang crop management ug maminusan ang risgo sa mga mag-uuma.
Lakip sa inisyatibo ang “White Revolution” nga gisunod sa sistema sa South Korea ug Cambodia.
Ilang ipatuman ang rain shelters ug simplified greenhouse structures nga makahatag og proteksyon sa tanom batok sa grabe nga ulan, pagbaha ug pest damage, samtang mas efficient usab sa paggamit sa tubig.
Ang mga pasilidad ipatukod duol sa dagkong merkado sama sa Metro Manila, Metro Cebu ug Metro Davao aron mapamubo ang delivery time ug maminusan ang post-harvest losses. Para sa Metro Manila, target sa DA ang mga probinsya nga Bulacan, Pampanga, Tarlac, Laguna, Rizal ug Quezon.
