BUTUAN CITY – Nag-viral karon ang usa ka lalaki sa Estados Unidos human gi-aprubahan ang usa ka patatas isip rehistradong gun silencer sa Bureau of Alcohol, Tobacco, Firearms, and Explosives (ATF).
Nasayrang didto sa Amerika, ang gun silencer usa ka kontroladong accessory sa armas ug kasagaran lisod ug mahal ang proseso sa pagrehistro apan ubos sa bag-ong balaod nga One Big Beautiful Bill, gihimo nga libre ug online ang pagrehistro sa mga suppressor.
Tungod sa kakulang sa klarong pag-verify sa mga disenyo, adunay mga lusot sa sistema nga gipahimuslan sa ubang tag-iya sa armas aron irehistro ang katingad-an nga mga butang sama sa unlan, lata sa energy drink, ug sa kaso ni Zach Clark, usa ka patatas.
Sigon ni Clark, dili niya gamiton ang patatas sa pusil, kay mabuak ra kini dayon kondili pagpakita lang sa kahuyang sa bag-ong sistema sa pag-apruba.
Nagsubmite siya og tulo ka aplikasyon alang sa tulo ka patatas nga lain-laing serial number kondiin duha niini ang naaprobahan ug usa ang gibalibaran, bisan parehas ra ang mga detalye.
Kini nga hitabo nagpakita nga posibleng adunay problema ang proseso sa ATF tungod sa kadaghan sa aplikasyon ug kakulang sa personnel
