BUTUAN CITY – Gideklara na sa House Committee on Justice sa pagpanguna ni committee chairman Rep Gerville Luistro, nga sufficient in form ang unang impeachment complaint batuk kang Pangulong Ferdinand “Bongbong” Marcos Jr. nga giduso niadtong Enero 19 ni Atty. Andre de Jesus ug gi-endorso sa House of Representatives pinaagi ni Deputy Minority Leader ug Pusong Pinoy Party-list Rep. Jernie “Jett” Nisay.
Kini human gipaminaw ang panig sa nagduso sa maong reklamo kondiin ang sufficient in form, nagpasabot nga kompleto ang dokumento, verified ug notarized, ug nasunod ang pormal nga requirements.
Dihang gihimo ang botasyon, mipabor sa pagdetermina sa sufficiency niini ang 46 ka mga membro sa komite samtang usa ang supak pinaagi ni Rep Benny Abante ug usa usab ang mi-abstain.
Samtang susamang deklarasyon usab ang gihimo sa ikaduhang impeachment complaint nga giduso nila Liza Maza, Teodoro Casiño, Renato Reyes Jr., ug uban pang mga aktibista.
Human sa botasyon, gisuspende gilayon sa komite ang ilang hearing kondiin mubalik sila ugmang adlawa aron susihon na usab kung sufficient in substance ba ang maong mga reklamo.
Higayong madeklarang sufficient in substance, magsugod gilayon ang hearings aron tukion ang merito sa mga akusasyon kansa mahimong musangko sa plenary debates ug posibleng impeachment trial sa Senado kung makalusot sa House of Representatives.
